Entry 94 " Jasmine......"

Ka naupan deuh lai a kan in bul pangpar huan ka siam lai ka ngaihtuah chhuak a. Ka huan chu lian lem lo tak mai a ni, a hmun te a zim avangin. Chu ka pangpar huan zim te ah chuan pangpar chi hrang hrang tam tak ka phun pawlh vek mai thin a. Ka zing thawh leh ka sikul ban veleh hian ka tlawh ziah thin. Huan ti fai leh pangpar tui pe hian ka buai ve em em thin.

Chu ta ka pangpar huan a JASMINE pangpar bik hi ka sawi duh bik deuh. Jasmine par hi a rim a na hle mai a, a par hi a rawng var, par lian em em lo a ni. A par chhuah hi chuan in bul vel ah hian a rim hi a nam chuk thin, a par pawh hi a mawi khawp mai. Mi then khat chuan a par rim hi an ngai thei lo hle bawk. A par vul lai hi chuan a kung pum ah hian a par chhuak vek mai. Tin, keini Mizo tan phei chuan pangpar huan ah a par vul chek tih mai loh chu kan hmang uar em em lo, rose leh pangpar dang kan hman nasat ang hian.

Mahse kha Jasmin pangpar tho mai kha midang chuan nitin eizawn nan leh incheinna mawi tak a tan an lo hmang nasa em em thung lawi si. Hmang chang hre takin mawi takin an siam chhuak in an mamawh mil tur ngeiin an hmang thiam em em bawk. South India lamah hian an uar zual deuh in kei ka hmu a. An khawpui chhungah han vah kual deuh chuan, kawngsir velah te, Rel chhungah te leh hmun tin maiah hian an zuar hmuh tur a awm. Sei tak tak in an phiar mawi em em. A phiartu te pawh hian an thiam zeih zeih hle a ni. Ka hmuh hmasak ber chuan din chilh meuhin an phiar dan ka en reng mai.

Pangpar hian hnamtin ah hmun a luah zau hle mai. Mahse kan chelek dan leh hman dan chu in ang lo khawp in ka hria. Keini Mizo te hian taksa a in cheinna a tan em chuan kan hmang meuh lo. Mahse south Indiaah te hi chuan in cheinna mawi takah an ngai a. An hmeichhiate hian an in bel uar hle. Kei ni chuan kan huan a, kan par vul chek tir bak loh chu a hman ngaihna ka hriat loh laiin, South Indian mi tan chuan an nitin chaw bel leh in cheinna mawi tak lo ni ve leh zel a. Engkim Siamtu ropui Lalpa hian keini mihringte tan hian ro a va rel kim tak em!

Jasmine pangpar chu sei tak tak in an phiar a.... an zuar mai thin...

Ti hian in cheina mawi takah an hmang mai.....       

Entry - 93 "Weekend Activities"

Kar tluanin Pathian venna leh kaih hruaina dawngin ka hna te tluang takin ka thawk thina, kar tawp chawl (weekend) hi ka nghak hlel hle thin ani. Kar tawp chawlh hun hi mahni nuam tih zawng leh mahni hna pawi mawh zual bik chin felna hun atan ka hmang deuh ber thin. Family leh Thiante nen len khaw thawnna hun atan pawh a rem changin ka hun ka hmang fo bawk ani.

Tun tum kar tawp chawlh (weekend) pawh rawn thleng leh ta reng mai a. Ni dang a ka tih thin fo tawh angin ka hman dan tur te ka suangtuah lawk a. Tun tum chu eirel lam siam na hun atan ka hun ka hmang khat a ni ber. Eirel leh sawngbawl dan chi hrang hrang hi ka tuina chi khat a nih vang hian ka hun tam tak hi ka hmang reng a ni. Hun ka neih phawt hi chuan TV show leh lehkha bu a mi te hi ka chhiar nasa thin em em bawk. Ei tur tui tak a siam tur chuan hun neih tam leh taimak hi a ngai em em mai a, chuvang chuan kar tawp tih loh hi chuan mi siam sa ka ei kual ve mai bawk a.

Vawikhatna a tan "Indian Hyderabad Chicken Biryani" leh "Chinese Grill Chicken" ka siam a. Biryani chi hrang tam tak siam dan a awm, mahse  kei chuan Hyderabad Biryani hi India ramah chuan a tui ber leh hmingthang ber a sawi a nih vangin leh kei pawhin tui ka tih em a vang hian a siam dan hi ka zir chik deuh bik a.Heng siamna tur a mamawh arsa leh a sawngbawlna chi hrang chu super market atang chuan kan lam khawm a. Chung a bawl hlo leh arsa vel lam khawm zawh chuan, siam turin ka han sawngbawl tan leh a. Vawikhatna ni bawk a ka khawr ve deuh hlek. Keini Mizo eirel chawhmeh siam dan nen chuan in ang lo hle mai. A sawngbawlna a pawlh tur zat, eirelna hmanrua, a minute leh dar kar leh mei ur sat dan hian kawng ro a su hle a ni. Ka han siam zo chu ka hah ve hle mai. Ei tur a peih a ni hnu a,kan chawp chhuak chu tui an ti hlawm hle a, chu chuan min ti hlim hle a ni.

"Hyderabad Chicken Biryani"

"Chinese Grill Chicken"