Monday, September 27, 2010

Entry - 102 " Cooking Sea Crab"

Tuipui Chakai siam dan. (Sea Crab)

Tun tum chu South Indian Tuipui chakai siam dan ka zir ve a. Kan Mizo siam dan nen chuan a in ang lo hle. Hnam dang siam dan hriat belh pawh hi a hlimawm hran pa ka ti hle. Kan Zoram tlangram chakai ka hmuh ve thin nen chuan a in ang lo khawp. Tupui chhunga cheng ta chu an lian zawk fe mai.

















Thil mamawhte :

1. Chakai  -  ½ kg
2. Tomato  –  2 lian tha deuh
3. Curry masala  –  Fiante hnih
4. Hmarchapui a hring  – Pathum
5. Coconut hring  –  gram 100
6. Sawhthing  –  gram 50
7. Purun sen  –  pum 2
8. Purun var  –  pum 1 lian tha deuh
9. Tel  –  Fian 3 emaw fian 4. (duh dan ni mai)
10. Chi  –  Mahni duh tawk.
11. Dhania hnah hring tlem.

A siam dan :

Chakai kha fai tak a sil tur.
Tui so ah minute 2 – 3  vel chhum tur.
Chuan a daih hnuah theh darh a tleng fai takah dah tur.
Tomato, Purun sen, leh sawhthing kha sawm tha tak a chan tur
Purun var kha sawm vak lova a den keh tur.
Coconut hi sawm tak a her tur.
Tichuan tel i chhuang sa ang a, tel hmui hnuah purun sen, purun var leh sawhthing kha thlak tur.
A chungah thlak tur i thlak zawh hnu chuan tomato leh curry masala kha thlak ang che.
Tomato kha a hmin deuh hnuah chakai kha thlak la tui tlem leih tawh tur.
Chung Chakai leh thil dang i thlak kha uluk takin chawh kual tur
Tichuan mei kha hniam takin dah la minute 30 vel ur tur.
Chu mi zawh ah coconut, chi leh dhania hnah thlak leh ang che.
Chu min hnuah minute 5 han ur leh la.
Chakai chu tui takin ei theiin siam peih a ni ta e.



Tuesday, September 07, 2010

Entry - 101 "Palai Inleng"

Kha mi zan tak kha chu aw! A thu mai chuan "Palai" tih tawngkau chheh hi ka hre ve em em a. Eng ang tak hian nge an Palai hna an thawh dan a takin ka hmu ngai lo. Hmu tur leh hre tur pawhin mahni chhungah a thlen miau loh avangin a bang bo theih ve hle mai. Kan hmanlai Pi leh Pu te hun lai nen chuan a dang ta hle awm e.

Thangkhat lian Mizoram ka lo chhuahsan ta reng mai! Mahni ram a awm ta lo reng chu kawp pui tur han zawn chung chang ah pawh ka huphurh em em thin. Zirna lam kan han zo a, chhungkuaah upa lam nih bawk nen chuan hna hmuh ang ang lo thawh a ngai a. Duh na hmun pawh thlang thei lo leh chhungte pawh thlahlel em em chhungin hlate khuaah kan kal a ngai a. Nulat nawm lai pawh hmang hman lovin hnathawk buai in hun chu ka lo hmang liam ve zel a. Hun leh dar kar lah chuan min nghak ve der si lo. A liam hian a liam vut vut mai si.

Ka hna lamah chawlh ka neih lai ni bawk a, mahni in lamah chawlh hmangin ka awm a. Chhun lamah te ka hna tul te chu phur tak chuan ka thawk mawlh mawlh a. Zan lamah Palai Inleng ka neih tur thu ka hre bawk nen. Lawmna lam thu ni mahse huhphurh rukna chuan min luah ru tlat a. Ka rilru ah chuan thil tam tak a lo lut zut zut reng a. Mo nih chu ka tlin ang em? Nu nih hi ka tlin ve tak tak ang em? Mawhphurhna hi ka zo ve ang em? La puitling tawk lova in hriatna te chuan ka rilruah zawhna tam tak alo lut nghal zung zung a. Ka naupan lai ka lehkha zir tan tirh atang a, ka vawiin ni ka tlen dan tleng in ka ngaihtuah a. Ka pa boral ni a ruang bulah ka awm thei loh te ka ngaihtuah chhuak a, lungte pawh a chhe rum rum mai. Mahse chu mi rual chuan tuarna pawh ka tan hlawkna a nih zia leh Pathian mal min sawmna ropui zia min hmuh nawn tir.

Tlai lam lo thleng a, zan riah kan han ei kham a. Palai hmel lo lan a hnai ta hle mai. Tunge an nih leh vawikhat mah an hmel kan hmuh leh hriat ngai loh te kha an rawn kal dawn si a, eng thu nge an rawn sawi hmasak ang le tih te ka lo ngaihtuah ve mai mai a. Chhungril tak ah chuan ka zak em em bawk si! Ka chhungte hmel han en pawh hian ka lai ve em em. Ka be tha vak ngam lo kha mi ni tak kha chuan.

Zan dar 7:00 p.m rik chuan thin chu phu ve zek zek a. Dar 7: 30 p.m chuan khawngkhar chu an rawn kik a. Palai hmel chu an rawn lang ta! Ka chhungte chuan an lo dawng sawng a. Kei chu mutna pindan lamah ka lo awm bo rih a. Palai lo kal te kha an fel khawp mai. Ka chhungte hre sa vek awm khan a awm thiam em em a. Thu khaw chang pawh a sawi tur a hre khawp a hun mil zel khan. Tichuan kei pawh chu an thu rel zawh tawh hnu chuan min han in hmel hriat tir a, thingpui te siam sakin kan hun hlimawm tak chu kan hmang liam ta a.